Am Dreikenig (1997) war a Dreffe en ra Wirtschaft en dr Naehe von Balenga uff dr Weschd-Alb. Genaugnomme war dees em Grottatal en Oberdigisheim.

Mit drbei wared:

[A Bild vo aelle] Von links noch rechts em Standa: Marco H., Olaf H., Ralf M., Jürgen D., Manfred B., Günter F.. Em Sitza: Dr Holger mit seim Fraule. Es fehlet dr Günter Eisele ond em Manne Baur sei Frau.

Aus der Sicht von mir ond em Ralf isch der Bericht. Es Meischte isch scho en alt.aeffle.und.pferdle gschdanda aber vielleichd hots it jeder midgriegt.

Mir drei dr Ralf dr Marco ond i send vo Ulm her gfahre so richdig quer iber d Alb. Ehingen, Riedlingen, Gammertingen, Neufra, Ebingen (Albstadt), Messstetten, Unterdigisheim, Oberdigisheim. Am Morga om halber zehne han i no brobiert beim Marco azrufa, dass ma ausmache ka wann ma wo wegfehrt ond i han en jo scho am Dag vorher it verwischd. Aber nemad do gwae.

Mit em Ralf han e alles glar gmacht. No ben e en d Uni nei komma ens Cafe Einschdein ond wer hockt do? Dr Marco. No hot sich rausgschdellt i han alleweil de falsch Nummer agrufa. Koi Wonder war der id do. No han i no da Ralf en seim Buerole abgholt ond no hen mr glei no en Ausdruck von onsrer OGF gmacht. Dees isch fei ganz schee viel worde. Die han i am Schluss em Manfred Baur seiner Frau en d'Hand druggd.

Fahre war trotz Wender guat ond wenn mr hettet en Riedlinge id no oimol romdrehe miasse waered mir echt pinktlich om zwelfe do gwae.

Also wie gsagt en Riedlingen habed mir die Ausfahrt Richdong Gammertinge verpassd ond send a Stick ens Staedle neigfahre. Om Kurz noch zwelfe send mr em Krottatal en Oberdigisheim akomme. Scho vor drausse hen mir nadierlich en kloine Blick auf d'Schpeiskard gworfa. Billig ischs jo it grad gell. Jetz wie fend ma en so ra Wirtschaft die Aeffle ond Pferdle Leit? Mir hen jo gar id gwisst wie die aussehet. Aber I han vom Reuchlins Holger gwisst, dass dr Manfred Baur hot da Disch bschtellt. Also semmer nei ond hen bei dr Bedienung gfrogt. Die hot glei gwisst oder zomindeschta a guata Ahnong ghet.

Ond so hen mir zom erschta mol die ganze Schwoba gseh, eigentlich lauter gschtandene Mannsbilder -- von de zwoi Frau amol abgsea. I han eigentlich aelle a bissle juenger gschaetzt ghet, aber i han mir au no nie so richtig ernschthaft Gedanka do driber gmacht ghet.

Dr Manfred Baur hot noch die diverse Leit vorgschdellt ond mir send ersch mol drzue ghockt. Glei druff isch dr Guenther Eisele no drzuakomma. [A Bild midem Guenther Eisele] Do sieht m' en auf der rechta Seita nebe mir und em Ralf. Verglicha mit em Guenter Fischer oder em Holger Reuchlin isch dees a reachts Biable. ;-) Aber der hot jo scho no gnuag Zeit zom Veschpra. Ond noch hen mir ons glei zom Gruppafoto zsammagschtellt. Dr Guenther Fischer hot da Apprat mitbrocht. Ond aelle hent en seim Schwaebischa Handworterbuach unterschreiba miassa. A Aeffle ond Pferdle Autogramm sozusage.

Dr Rescht von dr Onterhaltung hot dr Manfred Baur em Griff ghet. [dr Manne em Bild] S scheint wer aus Sidafrika kommt woiss ebbes zom verzehle. Wie er mit seine jonge Pfadfinder en da Busch ganga isch ond Loewa ond Elefanta gseh hot. Ond selle Gschicht wo hot ein kloiner Bua bei nacht ema Loewa iber d'Nes biselet hot. No hot er no voma Bekannta verzehlt wie der Diamanta fendet -- dees isch nemlich gar it so oifach -- ond noch en dr Kiche en a klois Gsaelz-Glaesle nei duat. Ond vom Gold wo er hot bei sich em Garta drussa romliega ghet hot. Mir wissat zwar dass ma net aelles glauba derf was der so verzehlt -- elf Kender hot au koine drfir acht Hond vielleicht, aber s war auf jeden Fall nett zom zuhera.

Essa hots do nadierlich au gebe. Oiner hot gmoint ob sich dees gher die ganze Bomm frit zom essa do sg i blos: Hano, wenn se scho uff em Disch schdanded, ebs verkommt ... Lieber da Mage verrenkt als em Wirt was gschenkt ;-)

Aber dr Ralf mag au no ebbes sage: genau: des mid de bommfridd wo do oiner gmoind hodd, des war schau haubdsaechlich i, wo dia nochher no zemlich nieder gmachd hodd, abr dr jirgen hodd au kraefdich middgfressld. ond drboi hodd di frau vom holger, wo sonschd schau rechd schdill gsia ischd, exdra no dui bedienong zriggbfiffa, damid se dia bommfridd wiedr zriggbrenga soll. dui sell ischd middam halbvolle schissele dermasse schnell oms egg nom gwae, bevohr i au bloss gmergd han, was do bassierd. vielleichd hoddse dia bommfridd dann au ausm kudderoimer raus ghold, abr warm waredse scho no a wengele, ond soss hodds jo au no ghedd.

ieberhaubd wared dia leidle en derra wirdschafd aelle so oglaublich schnell. deshalb hend dia au einen zahlenkohd en ihra schbeisskard. do derfsch nedd saga, dassda a wildend wilschd, noi, do bschdellsch du die nommer vierzea. ond wenns essa dann kommd, no kahs bassiera wia am nochbordisch:

bedienong: wer kriagd dia wildbladd?
geschd am disch: hemmr nedd bschdelld.
bedienong: ha scho, abr wer?
geschd am disch: ha dui well nommr ischd des dann?
bedienong: des muasse zserschd gugga.

ond erschd dann hodds sich uffglehrd. (dia geschd hennd an aelbler dialegd ghedd, den kahne nedd so; diasell bedienong hodd ohdeffinierd gschwaedsd.)

nocham essa semmr no a weile ghoggd ond henn am mafred zua- gherd, gell. ond no hemmr dfiass no a wengele verdabbd. ond dr siedaffrikamah ischd bloss em pulloberle romgloffa ond hodd nedd zugea, dasszsan friard. uff riggweg ben i middam ginder vornaweg gloffa ond no hemmr ons verfransd. also dui ordschafd hodd jo vielleichd drui schdraessle, abr mar hens gschaffd. erschd dr manfred hodd dann wiedr gwissd, wos nahgoh. des ischd wohl buscherfahrong odr so.

dronoch semmr dann glei widdr hoimgfahra. des hoissd, dr jirgen ischd gfahre ond i han gschlofa. dr marco, wo henna gsaessa ischd, hodd vrbrecher ennare kloina hidde abgschossa, abr des brauchadr nedd verschdanda (dr jirgen naebedmr lachd sich grad grangg, deshalb bleibds schdanda.) ja ond no semmr hald no a weile en dr uni ghoggd, so wia aellaweil hald.

an reachda dag wars, au wenns wirdschaefdle saudeier war, abr oimohl em johr derf mr jo ...


Meh Bildle: Dr Holger ond dr Manfred (lohnt sich)
Dr Olaf ond I


Ginder ond Evi en Dallas!


Es zwoite Treffe en Hörschwag!


Es dritte Treffe bei mir en dr Kuche!


Jürgen Dollinger