Mit drbei wared:
Mir zwoi dr Marco ond i send vo Ulm her gfahre so richdig quer iber d Alb. Om zehne rom hammr ons an dr Uni droffa, ond send glei losgfahra. Ehingen, Obermarchtal, Omleitong iber Bechingen, Zwiefalten, Huldstetten, Tigerfeld, do isch em Marco aufgfalle, daß er dringend tanke mißt, Pfronstetten koi Tankstell, Wilsingen koi Tankstell, Steinhilben koi Tankstell.
En Trochtelfingen hen mr no tankt ond do hads auf oimal agfanga zom schneia, nadierlich hot die Tankstell koi rechts Dach ghet. Wie mir noch weitergfahre sen hot's en Trochtelfingen nomol a Tankstell gebe mit Dach driber ond zersch hem mir no denkt die wär au billiger gwä dees hot sich aber beim zrickfahre it verifiziere lasse.
Kur vor Hörschwag send mir gaanz vorsichdig wege recht wenig Brofil da Berg nondrgrundschd. En Hörschwag isch es Rößle glei de erscht Stroß rechts. Mir send zwar zersch lenks gfahre aber hends no glei gmerkt. So send mr grad pinktlich om halb zwelfe akomma.
Wo mr dann akomma send, send scho dr Wolfgang ond dr Äffles-Rainer do'ghoggd, ond hend sich mid Schbedsi ond Kaffee zuagschidded. Also dr Wolfgang midm Schbedsi, ond dr Rainer mid ra gaanz groaßa Tass Kaffee äggschdra fr ihn gmachd. Nach ama Weile send dann zerschd'd Goda ond dann dr Holgr komma. D' Goda had da weideschde Weag aus dr Pfalz khet. Mir hend dann no bis omma kurz vor halb ois auf da Günther gwarded, ond dann hammr ohne en s Essa bschdelld.
D Schbedsialidäd vom Haus war a Riesakordonblöh. Des had ausgsea, wia wenn ma zwoi Sei gnomma hedd, a bißle Rauchfloisch ond Käs drzwischa ond dann mid ra Schdraußawalz driebrgwalzd hedd. Also ogloga zwanzig mal dreisig mal zwoi Zendimedr. Dr Holgr ond dr Marco hend des mid Schbädsla ond dr Rainr mid Pommes gfuadrd. Die ledschde baar Häpsla had dr Marco faschd nemme gschaffd. D Goda had an guada Zwieblroschdbroda mit Brodkartoffl ghet ond I hao da Hörschwager Schbieß brobierd. Dees isch a Filet mit Käs iberbacke. Dr Wolfgang a Schnidsl gessa. Mit Pommes, weil er drhoim dees id grieagt aber Schbädsla selber macht em Gegesatz zu dere Wirschaft wo kaufte Schbädsla nemmt was nadierlich a Manko isch. Aber essa hot ma's kenne.
Wo mr dann alle frdig wared, hammr ons iebrlegd, ob mr z'erschd an
Naochdisch essed, odr erschd a weng spaziera laufet. Do hett's dann
au zwoi Alternative gebe nemlich die Wendrädle ond a Käppele
auf am a Berg. Grad wo mr hand ganga meega, semmr beim Nauslaufa an da
Günther nagschbronga. Der isch dann ao mid zo dene Wendrädla,
dia wo dao en dr Näe von Melchingen schdanded. D Goda hot sich
noch leider glei verabschiede miaße weil se jo en weite Rickweg
hot ond a wenge Bammel wegem Schnee.
Ond so sieht se aus onser Goda (se hot mir a Bildle gschickt weil se jo
auf em Gruppefoto wo mr no gmacht hen net drauf isch):
Zersch hots no a Weng a Verwirrong geba weil der Holger ond dr Günther en andra Parkplatz agschteiret hen als wie dr Wolfgang on dr Marco, aber ma hot sich dann doch no gfonda ond die Wendraedle hot ma au scho uff dem Buckl doba gsaeh.
Mir send no koine fümpfhondrd Meedr gloffa gwea, dann had sich dr Holgr granadamäßig da Fuaß frdrabbd. Dann hemmr den Weag zo de Wendrädla nadierlich nemme schaffa kenna. Em Marco war dees ganz recht weil der isch do a weng faul.
So sen mr zur Salmendinger Kapell gfahre, do isch zwar em steiler Stich nauf aber net so weit. Den Berg nauf hot der Holger guat gschafft aber der Rainer hot mit seine glatte Turnschuh seine Problem ghet. Es hot jo frisch gschneit ghet ond no wars doch recht glatt. Dr Wolfgang hot no verzehlt daß do em Herbscht roiheweis d'Leit beim Schlehe brocka stande dädet.
Aber schee wars do drobe gell, so en richtige Sonneondergang auf der Alb fascht scho kitschig. Ond glei nebe dr Sonn hot ma da Zollern gsä. Dr Günther hot gmoint dees gäbs en Texas jeden Tag, aber aber Schnee hen se koin en Texas! No hen mir no a baar Leit do aghaue und die hen noch no a baar Foto mit em Marco ond em Günther ihre Apperat gmacht. Gruppenbild ohne Dame, weil d'Goda isch jo scho hoim.
Bsonders guat send die Bildle id worra, zom oine weil em Ginder sei
Dia-eiscann-Apprat net so do hot wie er hot wella ond zom andere
wahrscheinlich wege dem Licht vom Sonneondergang.
Wenn ma genau naguckt sieht ma von links da Marco, da Jürgen,
da Holger, da Günther, da Rainer ond da Wolfgang.
Auf em nächschta Bild da Marco, da Holger, da Jürgen, da Günther, da Rainer ond da Wolfgang:
Der Rickweg den Berg wieder nab war a oinzigs Abenteuer: Em Holger hot der Knechel wieder weh do, dr Rainer isch blos no grutscht ond em Rescht isch au id viel besser gange. Schteil ond glatt ebe.
Weil der Günther no nix rechts gessa hot, sen mr zrick en's Rößle hen do no a Eis fir mi en Zwiebelroschtbrota fir da Günther ond nomol en Spezialpott Kaffee fir da Rainer neizoga. Dr Günther hot noch no sei Notebook (so oins mit ma abissene Epfel druff :-) ) vorgfiehrt.
Hoimkomme sen mr guat, bis uff da Holger dem duat emmer no dr Fuaß weh ond hot vom Doktr en Schdabilisierungsstrompf verschrieba kriegt. Aber brocha oder grissa sei nix.
Em Wolfgang sei Wegbeschreibung.
Es erschte Dreffe: Groddatal
Last change 30/01/97 Jürgen Dollinger
