Modernisierte schwäbische Fassung von
Johann Wolfgang Goethes»Erlkönig«

Dr Erlkönig


Wer fährd ao so schbäd durch Nacht und Wend ?
Des ischd doch an Vadder mit saim Kend!
Em Audo rasad se durch da Wald,
send boide wieder mol ed ahgschnalld!

He Jonger, was duaschd de denn dreha?
I hann grad an Erlkönig gseha!
An Erlkönig, oh Mensch wär des schee.
- Ja ischs an Daimler, Porsche, VW?

Vadder, i hann des noh ed entdeckd.
Des Firmaschild isch sicher vrschdeckd.
Dr Jong duad aufgregd mit saine Hend.
Sei schdill ond bleib ganz ruhich, mai Kend!

Oh Vadder, Vadder, siehschen des ed.
Mensch ischd der schee, i will ed ens Bedd!
Oh Jonger, Jonger, woischd du jetzt was?
I fahr dem noch ond geb noh meh Gas!

I mag des Audo, mie reizt sai Gschdald.
I muaß des gseha hann, notfalls mit Gwald!
Oh Vadder, Vadder jetzt hosch no glei.
Schneller, schneller, no ferschd dra vorbei!

Mit Schboiler ond mit Abarthahlag,
an Erlkönig ischs, wenn dr i sag.
Ja guck ao, der fährd äwwl schneller.
Vadder gib Gas, s wird ao scho heller!

Dr Jong der hangad zom Fenschder naus.
Do vorna siehds noch ra Ölschbur aus.
Dr Waga schleuderd, drehd sich omd Achs.
Dr Bua leid em Wald, so weiß wlea Wachs.

Em Vadder grausads, er rasd ganz gschwend.
Henda em Audo ächzad sai Kend.
Er schaffds zor Klinik mit Müh ond Nod,
doch aufem Rücksitz, sai Kend, war dod.